YIDEFRENESCA

Joan Ferrarons i Llagostera

ליטעראַרישער איבערזעצער

זשואַן פֿעראַראָנס אי ליִאַגאָסטעראַ האָט אַ באַקאַלאַװראַט אין איבערזעצונג און אינטערפּרעטאַציע פֿון דער אױטאָנאָמער אוניװערסיטעט פֿון באַרצעלאָנע און איז אַ מאַגיסטער אין פֿילאָזאָפֿיע פֿון דער אוניװערסיטעט פֿון באַרצעלאָנע. ער האָט אױך שטודירט אין דער הומבאָלדט-אוניװערסיטעט פֿון בערלין, דער אוניװערסיטעט פֿון לײַפּציג, דער אינטערנאַציאָנאַלער אוניװערסיטעט פֿון װאַלענציע און דער ייִדישער פֿאָלקסהױכשול פֿון בערלין.

ער איז מיטגליד פֿון סעדראָ (Cedro), דעם שפּאַנישן שרײַבערס- און פֿאַרלעגערס-בונד, אַזױ װי פֿון דער גרופּע פֿאַר עטנאָפּאָעטישע פֿאָרשונג פֿון דער קאַטאַלאַנישער שפּראַך- און ליטעראַטור-געזעלשאַפֿט, װאָס געהערט דעם אינסטיטוט פֿאַר קאַטאַלאַנישע לימודים. ער האָט געהאַלטן רעפֿעראַטן און געגעבן סעמינאַרן אין עטלעכע אינסטיטוציעס פֿון פֿאַרשײדענע לענדער. יאָר 2015 איז ער געװאָרן פֿאַרבעט צו באַטײליקן זיך אינעם צװעלפֿטן סעמינאַר פֿונעם אײראָפּעיִשן איבערזעצער-בונד (EÜK).

אַצינד לערנט ער װי אַן אַסאָציִיִרטער פּראָפֿעסאָר אין דער פֿאַקולטעט פֿאַר איבערזעצונג און אינטערפּרעטאַציע פֿון דער אױטאָנאָמער אוניװערסיטעט פֿון באַרצעלאָנע.